بقلم أبو راغب

تعو نصلي بلا سجادة ولا مسبحة ولا بخور. نصلي مش بجامع ولا بكنيسة ، نصلي هون بنص الكون .
تعو نصلي هلق يمكن هيدي ليلة القدر و يمكن بكرا هو صباح القيامة.
نصلي بثياب و بلاها. لابسين نعال او حافين. على الارض واقفين او راكعين.
بس لازم نكون طاهرين . منبلش بقلوب متسامحين .
ومنكون مثل هل تراب يلي خلقنا منو و منرجع الو ومنضل طاهرين.
مثل المي يلي هي الحياة و مثل النور يلي شع من شجرة زيتون.
تعو على جبل النور و على مغارة الوحي و على الوادي المقدس وهول جواتنا ما بدهن حج و لا هجرة.

تعو نصلي بلا حكي و لا كلامات او تمتمات.
نصلي بعيون طفل اخد منك رغيف ، و بعيون ام حميتها بخيمة.، و اب كمشت ايدو و ما تركتها.
نصلي حد سرير مستشفى و شوفير صهريج المي و البنزين ، و شغيل الفرن وحامل مكنسة على الطريق..
تعو نصلي وعد مثل وعد جدودنا بالضيعه انو نحن العونة و بالعونة كل يلي نهدم بيتعمر .
تعو نصلي وما ننسى ماضي و نتحمل حاضرنا ونكون هون بكرا و بالمستقبل.
تعو نصلي احرار ما فينا عبيد.
نصلي انسان لانسان.
نصلي لرب بيسمع ايه بيسمع.

ولكم ولنا طول البقاء