بقلم أبو راغب
بابا شفت اسعار الكتب والقرطاسية،نار !
وقررت ما روح السنة على المدرسة.
انت موظف على قدك و السنة الماضية نقلتني و اختي من الخاصة الى الحكومية،بس حتى هون في مشكل كبير.
ما يهمك يا ابني طلبت سلفة
و بدي أمّن كل المطلوب.
بابا انا راضي بالكتب المستعملة بس الشنطة تبع السنة الماضية مهرية وانا برتبها بس خايف من عيون الطلاب يللي بالصف .
ليش عم يتنمروا عليك ؟
بابا زميلي بالصف ابن معلم مصلحة صار بيجي على المدرسة بسيارة فخمة و ثياب حلوة و شغلتوا و عملتوا يجمع خمس طلاب بالملعب و يتغامزوا عليٓ .
حتى امو شجعتوا وقال الصبي شخصيته قوية و مهضوم.
بابا ليش ما في خرجية و ليش كل يوم سندويشة لبنة و غيري بياكل منقوشة و كروسون من الدكان ؟
كلو منرتبه يا ابني ما بدي ياك تترك العلم.
بابا لشو العلم و الوظيفة.لشو بدي صير مثلك. بدي اتعلم مصلحة. و المصلحة ذهب.
بس ،خلص، عم تزعلني يا ابني.
بابا بقلك سر !
اكثر شي جرحني انو المعلمة ضحكت على ثيابي بنص الصف .
بابا العلم مش للفقرا.
المدرسة ما بتعلم اخلاق و لا تربية… الشارع بيعمل ناس يدعسوا الناس .
ولنا و لكم طول البقاء.